Tədbirdə müflisləşmə institutunun aktual problemləri, MDB ölkələrində arbitraj idarəçilərinin hüquqi statusu və dövlətlərarası əməkdaşlıq imkanları kimi məsələlər müzakirə olunub.

Sankt-Peterburq şəhərində “Paradnaya Assambleya” Beynəlxalq Antiböhran Konqresi keçirilib. İxracın və İnvestisiyaların Təşviqi Agentliyinin – AZPROMO-nun nümayəndəsi sözügedən tədbirdə iştirak edib.

İki gün davam edən konqresdə Azərbaycan, Belarus, Qazaxıstan, Rusiya və Tacikistanın dövlət orqanları, nazirliklər və müvafiq qurumların nümayəndələri iştirak ediblər. Tədbirdə iştirakçılar arasında antiböhran idarəetməsi sahəsində Rusiya və MDB ölkələrinin tendensiyalarını və qabaqcıl təcrübələrini ümumiləşdirmək üçün fikir mübadiləsi aparılıb.

Konqres çərçivəsində dövlət orqanları, ticarət və sənaye palataları, Anti-Böhran İdarəetmə Peşəkarlarının Milli İttifaqı, özünütənzimləmə təşkilatları, maliyyə şirkətləri və elektron ticarət platformalarının nümayəndələri və rəhbərləri, eləcə də hüquqşünaslar və arbitraj idarəçiləri çıxış ediblər. İştirakçılar müflisləşmə (iflas) və maliyyə sağlamlaşdırılması institutunun aktual problemlərini, MDB ölkələrində arbitraj idarəçilərinin hüquqi statusu və dövlətlərarası əməkdaşlıq imkanlarını, o cümlədən investisiya cəlbediciliyinin artırılması, mediasiya və digər məsələləri müzakirə ediblər.